MASHWARA

Teri in palkhoun key peeche

Kya khwaab sajey hain

Koi kya jaaney

In Troy ki deewaroun mein

Kya shehar basey hain

Koi kya jaaney

Mai bhi

Bus itna hi jaanta hoon meri jaan

Ki duniya ko

Sapney acchey nahi lagtey

Nanhi ladkiyoun ki aankhoun mein

Yeh sachey nahi lagtey

Woh noch letey hain

Sapnoun samet aankhein

Tum kitni hi palkhein jakad lo

Aansouon se baandh bandh lo

Yeh lakdi ka godha bana hi lengey

Usey khuda ka naam dey bhi dengey

Tere sapney bhi ley lengey

Tujhe kafir bhi kar dengey

Mera bus itna kehna hai

Meri pyari, meri bacchi

Unhey khabar na honey dena

Ki teri aankhoun mein sapna hai

Tera koi bhi apna hai