MAI NAZM NAHI, MAI AZAAD HOON

Us key wajood mein rakha hua

RDX phata

Tou maine

Maani ki cheethdoun pey

Alfaz ki dhajiyaan

Laga kar

Kagaz pey rakh diya usey

Wo saans leney lagi

Magar uska

Nazm-o-Nizaam

Bigad chuka tha

Tashbih ki khabar nahi par

Istiaara jal chuka tha

Maine

Qalam ki nok sey

Khoon mein luthdey

Uskey badan ko

Choo kar kaha

Qagaz sey

Bahar na nikalna

Wahan nuqaad baithey hain

Jo lafz lafz tolengey

Tujhe kya kya na bolengey

Behtari issi mein hai

Yahin

Qagaz mein dafan hoja.

Qagaz key ik Koney ka

Sahara ley kar

Apney zakhmi wajood ko

Utha kar

Us ney

Mujhse kaha:

Mera husn

Mere lafzoun ki tarteeb

Sab bigad gai hai

Mai nazm tou bilkul nahi

Nazm tou mera

Istiaara bhi nahi

Mai tou

Kashmir hogai hoon

Isliye

Mai azaad hoon,

Azaad hoon mai