Manto Ke Naam Khat

Sheher mein ab bhi

Naya Qanoon nafiz hai

woh jiski

unhein talaash hai

woh Asli Jinn

unhein

mila nahi hai

Aap kahan hain

aap key Kashmiri

ab bhi

Siyah Hashiyoun mein

jee rahey hain

unhein

Thanda Gosht samajh kar

noocha ja raha hai

khaya ja raha hai

Aap kahan hain

unkey zakhmoun pey

Phaha tou lagayiye

unhein

Tetwal Ka Kutta

Bana diya gaya hai

Aap kahan hain

woh bazaarein

jahan

Phunduney aur Kaali Shalwaarein

milti thein

woh

Dhuaan ho gayein hain

Woh 100 Candle Power ka Bulb

Suraj sey zyada roshan

ho gaya hai

Aap kahan hain

Shu Shu ab

Usi kamrey mein

bandh hai

aur Mozail,

Babu Gopi Nath

aap ko

aaj bhi

dhoondh rahey hain

Aap kahan hain

Ab aajaeiye

Sadak Ke Kinarey

Aaj bhi Toba Tek Singh ki

Nangi Aawazein

Goonj rahi hain

“Opad di gud gud di moong di dal di laltain di Hindustan te Pakistan di dur fitey munh”

P.S: Aur haan, aap ki kitaaboun ki qeemat aap sey bhi zyada hai. Agar aaj aap hotey tou adalat aap ko jurmaaney key tour,  apni hi kitaabein khareedney ki saza deti.
Aapka Muzaffar Karim