DARK CIRCLES

Ye jo siyah dayire
Tumhari palkoun pe aaye hain
Kya tumhari aankhoun kay saaye hain

ISHQ KA ROZA

Ishq ka roza
Aahun se toot'ta hai
Aansuoun se nahi

SHANASAAYI*

Tumhari furqat mein
Khud Se bahut guftagoo ki hai
Tumhe dekhne kay liye ab Mujhe
Darmiyan se hatna hoga

*( Nazr e Jaun Elia)

ISTIAARA

Woh vida ho chuki
Uskey kamrey ki roshni bandh hai
Kab se meri zaat ka
Istiaara yeh manzar hai

INCONVENIENCE REGRETTED: WORK IN PROGRESS

Ek naya raasta banane kay liye
Mere dil kay kaise kaise
Makaan dha diye usne

DUA E SAFAR

Mujhe Dua e Safar tou yaad nahi 

Magar jab bhi tumne mujhe

Choom kar rukhsat kiya

Poora safar

Tumhare honthon kay daiyerey kay

Tilism mein raha

Tumhare honthon ka lams Jaana

Meri Maa ki Duaoun jaisa hai

Ab jab

Tumhare honthon ka sahara bhi nahi

Aur dushwaar safar bahut taweel hogaya hai

Dua e safar yaad karne ka waqt bhi agaya hai